Խաղաղությու՞ն, թե «խաղաղություն», ոսկու ռեկորդն ու միլիոնների կրիպտոկողոպուտ

Ինչ ենք կարդում այս առավոտ

Հայաստանում մոտակա օրերին, կախված հայացքներից, փառաբանելու կամ անիծելու են Ադրբեջանի հետ խաղաղության պայմանագրի հնարավոր ստորագրումը։ Փաշինյանը հաստատել է, որ հայցերը հետ են կանչվելու, իսկ «երրորդ ուժերը» հեռանալու են սահմանից, Ադրբեջանն էլ՝ Մինկի խմբի լուծարում ու Սահմանադրության փոփոխություն է պահանջում։

Մինչ այդ, Պուտինը հայտարարել է, որ համաձայն է 30 օրով դադարեցնել մարտական գործողությունները՝ պայմանով, որ այն պիտի երկարաժամկետ խաղաղության հիմքեր դնի ու վերացնի կոնֆլիկտի հիմքերը (whatever it means). Զելենսկին դա անվանել է մանիպուլյացիա, Թրամփն՝ ասել, որ հայտարարությունը հուսադրող է։ Թե Հայաստանի, թե Ուկրաինայի դեպքում պարզ չէ՝ կլինի երկարատ խաղաղություն, թե ոչ։

Վրացի դիզայներ Դեմնա Գվասալիան էլ Gucci նոր կրեատիվ տնօրենն է դարձել

Դրան նախորդող 10 տարին նա նույն պաշտոնի էր Balensiaga-ում ու դարձրել է այն ամենահայտնի բրենդներից մեկը։ Իսկ թե ինչպես Աբխազիայից փախստականը դարձավ ժամանակակից մոդայի ամենաազդեցիկ դեմքերից մեկը, կարդացեք այստեղ։

Իսկ աշխարհում տիրող իրավիճակի ու բիթքոյնի անկման ֆոնին թանկանում է ոսկին

Մեկ տրոյական ունցիայի գինը հատել է 3000 դոլարի շեմը՝ պատմության ընթացքում առաջին անգամ։ Պատճառներից մեկը նաև Թրամփի մաքսատուրքերն են․ ոսկին նաև ավանդաբար համարվում է ինֆլյացիայի դեմ պայքարի միջոց:

Բիթքոյնը ծանր անկումից հետո մի փոքր աճել է։ Իսկ հյուսիսկորեացիները բարեհաջող կերպով քեշի են վերածել Bybit-ից գողացված 1․5 մլրդ դոլարի կրիպտոարժույթից 300 մլն դոլարը։